陈凯琳完美复刻同老公定情剧角色 女版「刑活著」神似度高获郑嘉颖激赞 - 东张+

　　陳凱琳Grace近年成功進軍做網紅，不時緊貼潮拍片放上網，最近佢就好有創意，完美復刻10年前同老公鄭嘉穎Kevin嘅定情劇《殭》，入面對方所飾演嘅角色「刑活著」。

　　Grace帶住冷帽襯上一件爛佬T恤企喺開放式廚房，抄足劇中形活著冷酷嘅語氣問：「肚餓呀？坐低吖，煮啲嘢你食﹗」仲問大家覺得佢呢個男裝打扮係咪可以殺出另一條血路。見Grace舉手投足相似度爆燈，連嘉穎都忍唔住轉載片段兼留言話：「老婆你係得嘅，依家仲玩到要扮埋我嘅角色。」相反Grace可能唔知咁樣玩會唔會激親老公，就講笑話：「Call me 刑活著，Kevin's gonna kill me.」(叫我刑活著，嘉穎想殺咗我)，兩夫妻大玩隔空傳情。

　　嘉穎同Grace喺2015時合作拍TVB劇集《殭》，有指佢哋當年係隨劇組遠赴荷蘭拍攝三星期外景時躂著，兩人拍拖三年後喺2018年舉行婚禮，至今先後誕下三子，一家五口幸福滿瀉。

　　當年拍攝呢套劇時，Grace仲係位新人，對拍劇充滿新鮮感，幸得前輩嘉穎引領。劇情講述五百年前，錦衣衛刑活著(鄭嘉穎飾)奉命殲滅殭屍，意外成了不死人，由荷蘭返港後就化身深夜食堂「夜吾夜」老闆。一次意外出手救咗藍夢瑤(陳凱琳飾)後，女方就鍾情刑活著，可惜男方已心有所屬，故而上演一場虐戀，Grace呢條片一出，即勾起觀眾當年煲劇嘅回憶、經典情節同對白。